https://m.elwatannews.com/news/details/3720262
https://m.elwatannews.com/news/details/3720262

لم تخل الحلقة الأولى من برنامج "مصر اليوم" للإعلامي الدكتور توفيق عكاشة، المُذاع عبر فضائية "الحياة"، من اللمحات الكوميدية المعهودة لعكاشة الذي عرفته الجماهير عبر شاشة قناة الفراعين التي كان يمتلكها، وظهر على شاشتها لتقديم برنامجه باستمرار، قبل توقف بثها لمشاكل مالية.

عكاشة حرص كعادته على استخدام "كلام المصاطب"، والحديث بلغة سهلة يفهمها أهل الشارع، ولم تخلو الحلقة من "إيفيهاته المضحكة".

"الوطن" رصدت بالفيديو أبرز لقطات عكاشة خلال الحلقة:

- "لما تلاقيني بطبل أرقصلي"

قال الإعلامي توفيق عكاشة، إن مصر تخوض حربا شرسة بكل ما تحمله الكلمة من معنى، موضحًا أنه "لا يُطبل" للقيادات السياسية ولا يقول إلا الحقيقة.

وأضاف عكاشة: "ميجيش واحد بقا يقولي ده توفيق عكاشة هيطبل، هرد عليه وأقوله يا خويا لما تلاقيني بطبل أرقصلي، عشان أنت جاهل، لأن أنا بتحدث بالوثائق والمستندات بما هو جديد".

 

- "أنا راجل بتاع مصطبة والساعتين ميكفونيش"

واشتكى عكاشة من قصر وقت حلقته، قائلًا: "هطلع فاصل لأن وقت الحلقة ساعتين، وأنا قولتلهم يا جماعة مينفعش ساعتين معايا أنا راجل بتاع مصطبة، وعايز أقيس بالمتر وهما مفيش فايدة، وقالوا هما ساعتين، طب خلاص يا عم ساعتين ساعتين، هنشتغل ونتوكل على الله".

وداعب عكاشة مخرج برنامجه: "يالا يا عم عز أخرج بفاصل، قول للمخرج هو اسمه إيه.. اسمه أحمد، طب أطلع فاصل يا أحمد".

- "ضهري وجعني ولازم أقوم أقف"

واشتكى عكاشة من ظهره وطلب الخروج لفاصل ليتمكن من فرد ظهره، قائلا: "هتقولي يا عم توفيق إزاي إحنا بنعيش أخطر حرب في تاريخنا، هقولك وهفهم حضرتك وهقولك كل حاجة بالراحة خالص بعد الفاصل، لأن بصراحة ضهري وجعني (قفش) ولازم أقوم أقف عشان أبقى صريح معاك".

ولم تخل الحلقة من مشاغبات عكاشة مع معدي برنامجه، حيث انفعل على أحد معدي البرنامج، قائلا: "جرى إيه يا عم أنت هتخيلني ليه، يا أخي أقعد، عمال يعدي من قدامي وقرفني ياخي أقعد خلينا نفهم الناس".

- "أنا لابس بدلة من 3 سنين والله ماشتريت بدلة من 3 سنين"

قال الإعلامي توفيق عكاشة، إن قناة "الجزيرة" القطرية تّدعم الجيوش الإلكترونية على "الإنترنت" من جماعة الإخوان الإرهابية، وتنفق عليها 10 ملايين دولار شهريًا من أجل تحويل المواطن إلى ساخط وناقم على وطنه.

وأضاف عكاشة: "طب أدوني مليون واحد، ده أنا مشترتش بدلة من 3 سنين"، مطالبًا المواطنين بتوخي الحذر من المخطط الذي يُحاك حول مصر: "شغلوا الجمجمة.. بلاش تسيبوها تحت السرير".

- "اسمع يا رجب"

ووجه عكاشة مستمعيه واختار أن يناديهم ببعض الأسماء مثل رجب، فقال: "اسمع يا رجب أقسم بالله لأقولك فين الصح وفين الغلط، لو كلفني حياتي لن أتنازل عن أني أقولك كلمة الحق وأين الصح وأين الخطأ، وأجري وثوابي على الله".

- "الست روحية وأم حسن وخديجة وأسماء وأمثال"

وقال عكاشة: "أنت النهاردة يا سعادة الباشا أنت والست روحية، اللي قاعدة تبص.. بصي قوي ياختي بس عايزك تفتحي ودنك زي مانتي مفتحة عينك".

وتابع: "ليه بقا يا ست أم حسن عشان خاطر الموضوع كبير، الموضوع كبير يا صبحي، الموضوع كبير يا ست خديجة، أنتي وأمثال وأسماء والجماعة الشباب اللي شايفين إن ممكن كلامي ميعجبهمش، أنا مش عايز منهم ولا عايزهم يعوزوا منا حاجة، بس يسمعوا الكلام عجبهم أهلا وسهلا معجبهمش يا عم ارميه البحر والبحور كتير".

- "إحنا أرانب"

وانتقد عكاشة زيادة عدد السكان، قائلا: "إحنا بالصلاة على النبي أرانب أرانب، والعدد كبير وأعداد مهولة كيف يمكن السيطرة عليه".

- "يا عم إرمي الشيشة مش وقتها"

ووجه عكاشة كلامه لمن يجلسون على المقاهي: "أنت بقا يا خويا سيبت الكلمتين اللي أنا قولتهم وماسك لي الماشة، عمال تشوفلي الحجر والبتاع يا عم ارمي الشيشة الهباب دي، ارميها الله يهديك مش وقتها خلي وقتها بعد الحلقة".

- "الست سعدية وسعاد وأستاذ تامر"

وواصل عكاشة توجيه حديثه للمشاهدين: "عشان كده يا ست سنية أنتي وسعدية وسعاد لازم تعرفوا، عشان كده يا أستاذ تامر أنت وهيثم لازم تفهموا، عشان كده يا عم إبراهيم أنت وعبدالله، شوف ياخي الجدع اللي قاعد عالقهوة وبيتلفت حوليه.. ياخي اسمع ياخي وخلي ودنك معايا.. ياخي متبصليش جايز أنا خلقتي عكرة.. اسمعني عشان تعرف أنت عايش في إيه وإزاي".

شكرا لمتابعتكم " https://m.elwatannews.com/news/details/3720262 " على موقع " الدولجية نيوز "، ونتمني متابعتنا على قنواتنا الرسمية خلال وسائل التواصل الاجتماعي لمتابعة الاحداث واخر المستجدات ، مع اطيب التحيات .

المصدر : وكالات